(ពាក្យ ៧ ធម្មតា)
ជីវិតត្រូវមានការឆ្លងកាត់ ឧបសគ្គវិបត្ដិគ្រាប់ប្រភេទ
តស៊ូយកឈ្នះទុក្ខវេទន៍ ជាបុព្វហេតុដល់ជីវិត។
ជីវិតឆ្លងកាត់ការអប់រំ ចេះដឹងគួបផ្សំនឹងគំនិត
ទោះបីមិនបានប្រាជ្ញបណ្ឌិត គង់មានគំនិតប្រឌិតឆ្នៃ។
កំណើតល្អជាព្រោះគំនិត លកលៃជីវិតឲ្យប្រពៃ
សន្សំរៀនសូត្រប្រចាំថ្ងៃ កែច្នៃជីវិតផុតកង្វល់។
គំនិតគឺជាធនធាន បើគំនិតមានផ្នែកកុសល
គង់តែចម្រើនកើតមានដល់ វឌ្ឍនភោគផលព្រោះបដិបត្តិ។
អ្នកអត់គំនិតគិតមិនចេញ ប្រាកដពោពេញក្តីវិបត្តិ
បើអត់គំនិតទុកដូចក្រខ្សត់ ជីវភាពអត្តខាត់ដល់ជីវិត។
មានគំនិតពិតមានកំណើត រកស៊ីបង្កើតការងារសុចរិត
ទ្រព្យកើតមានដោយការប្រព្រឹត្ដ កើតដោយគំនិតគិតវែងឆ្ងាយ។
អ្នកមានគំនិតពិតជាមាន ផ្នែកបញ្ញាញាណនិងប្រាជ្ញប្រាយ
គេមានគំនិតមានមធ្យោបាយ ដោះស្រាយបញ្ហាបានជោគជ័យ។
ដោយៈ ឆេង ឆាយា