(ព្រហ្មគីតិ)
មនុស្សល្ងង់ប្រាកដខ្វាក់ មើលមិនជាក់អ្នកជុំខ្លួន
ប្រើមនុស្សខុសពីក្បួន រកខួរយួនប្រើល្អជា។
មនុស្សខ្វាក់មើលមិនឆ្ងាយ មិនសប្បាយអ្នកសិក្សា
ស្អប់ខ្ពើមចាត់ទុកថា ដូចបន្លាក្នុងកែវភ្នែក។
មនុស្សល្ងង់ប្រាកដពិត ទោះជាគិតក៏គិតប្លែក
មនុស្សស្មោះមើលខុសភ្នែក ឯមនុស្សក្អែកបែរកៀកកិត។
អ្នកល្ងង់គង់ជាមេ ឯអ្នកក្បែរខ្លៅងងឹត
ធ្វើការគ្មានគំនិត គិតតែបក្សពួកខ្លួនឯង។
មនុស្សល្ងង់មានៈរឹង ច្រើនទទឹងឫកខែងរែង
ស្អប់ខ្ពើមខ្មែរគ្នាឯង ងប់តំណែងតែងភ្លីភ្លើ។
សង្គមបច្ចុប្បន្ន សម្ពាធធ្ងន់មនុស្សល្ងីល្ងើ
រៀនរស់តាមដំណើរ ធ្វើទង្វើស្របតាមចោរ។
មនុស្សល្ងង់ប្រាកដជា ធ្វើការងារប្រាសចាកធម៌
រើសអើងនិងមនុស្សល្អ សេពគប់ចោរអ្នកអែបអប។
ខ្មែរយើងឥឡូវនេះ អ្នកដែលចេះត្រូវគេស្អប
រស់នៅគេធុញថប់ គេលែងរាប់ទុកជាគ្នា។
សូមឲ្យខ្មែរគ្រប់ប្រាណ បើកសន្តានឲ្យល្អជា
ឈប់ស្អប់ខ្មែរដូចគ្នា ព្រោះយើងជាខ្មែរតែមួយ។
ដោយៈ ភិក្ខុ ឆេង ឆាយា